第１宮
第１宮係掌管個性同外貌的宮位，如果想真真正正了解自己係個點樣樣的人，就一定要畀多Ｄ時間落呢度睇睇啦！想知道一個係和藹善良定係好勇鬥狠；勤奮好學定係馬虎懶惰，根深柢固無辦法改變的人格通通都可以響第１宮裡面睇得到。另外仲有係一個人的喜惡亦會受到第１宮的情況影響，例如一個第１宮係天蠍座的人會對外星人、鬼怪、異度空間等等一切神秘事物非常著迷；又例如一個第１宮係處女座的人會對工作異常認真，而且仲會好注重健康。
另一樣影響較深遠的係當事人的肉身，例如第１宮響雙子座的人會生得斯文清秀；又例如第１宮係巨蟹座的人身形會較為豐滿。除此之外仲有係體質，例如第１宮響山羊座的人身體的骨骼會比較脆弱，要畀多Ｄ心機做好準備，飲多幾盒奶。如果金星落響第１宮，人亦會生得較靚仔靚女，總之第１宮的功能就係決定一生下來會擁有咩的身體硬件。
第１宮對應白羊座，支配星係火星；當白羊座又或係火星落入第１宮時會大大增強呢個宮位的影響力。不過凡係過多行星集中響同一宮，或者係一Ｄ對應的星座同行星都落響同一宮，符合以上都會令宮位的力量過強。如果第１宮力量過強就會令到當事人變得太過自我同有自大的傾向，忽略其他人的需要，漠視其他人的感受，造成太獨立而且容易產生孤獨感。
第２宮
講完掌管身體的第１宮，跟住就到講下生命裡面的其他事：第２宮的基本主題係「錢」，如果再深入Ｄ講當然就唔止係錢咁簡單，不過都係離唔開呢個題目。第２宮掌管「物質」的生活，佢包括的並唔止顯示財運，仲可以睇到當事人可以享用的可動產數量，可動產係指例如流動資金呀、金條呀又或者係價值連城的古董。響出星圖之中，同「金錢」有關的宮位一共有3個，分別係第２宮、第５宮和第８宮，而三者所指的「金錢」又有唔同的意義：第２宮係針對正財收入，即係工作的收入或者兼職賺返來的收入；第５宮係針對偏財收入，即係投資或者買股票之類；最後第８宮就係針對橫財收入，例如賭錢又或者係另一半畀你駛的錢。
除了同持有的資產有關外，第２宮仲會影響到當事人的理財態度同物質價值觀，係守財奴定係會視錢財如糞土呢？例如第２宮響金牛座，呢個人的理財能力就會好高，而且鍾意以踏實保守的儲蓄方式管理，好識得享受生活。又例如一個第２宮有火星兼且係天秤座的人，佢對物質生活追求高品味之餘亦好鍾意愛駛錢，好大機會成為購物狂，可惜理財能力又糊裡糊塗，成日攪到自己陷入經濟困局。
第２宮對應金牛座，支配星係金星；當金牛座又或者係金星落入第２宮時力量就會大大提升。如果第２宮過強就會形成太過固執的性格，過度渴求安全感，過份注重物質生活同金錢上的比重，會變成見錢眼開的人，而且佔有慾非常強！
第3宮
比起第１宮同第２宮，第３宮涉及的範圍就大好多，需要用心記住佢，第３宮主要係圍繞住環境同關係。首先講下同「環境」有關的功能，簡單講就即係「集散」，集合同分散，所謂「集合」係指思考同知識，由從外面的環境吸收到的事項；而「分散」係指溝通同通訊，即係將自己的訊息傳遞出去咁解。如果一個人的第３宮響處女座，呢個人心思細密，好有組織能力而且仲好鍾意同人溝通，不過亦會非常囉嗦。如果水星同金星落響第３宮，當事人的溝通能力會好強，適合做傳媒工作又或者作家。
至於輪到「關係」的部分，係指自己唔能夠選擇的人際關係，例如兄弟姐妹、左鄰右里同同事；由第３宮的情況可以知道當事人有冇兄弟姐妹？同佢相處成點樣？會唔會成日遇到Ｄ麻煩鄰居？如果另一半的第３宮出現了太陽、土星萬一仲要係巨蟹座的話，就一定要有心理準備響拍拖期間成日出現兄弟姐妹幾人同行的狀況。
最後一點，第３宮會顯示出當事人的基本教育同短途旅行運，何謂「基本教育」？所謂基本教育係指早期教育，香港的情況指幼稚園至中學階段；而短途旅行就係泛指圍繞香港附近的地區，例如台灣、日本、新加坡等等。順便講埋，如果想知道當事人高等教育同長途旅行的情況，就要睇第３宮對面的第９宮，就是因為有咁的分野，所以有?細細個讀書好鬼叻，但係去到升讀大學時就會出現種種唔同的困難。
第３宮對應雙子座，支配星係水星；當雙子座又或者係水星落入第３宮時力量會大大得到提升。但係宮位過強會導致當事人個性唔穩定，思想混亂，變得神經質同埋容易浮躁，有時亦會因為反應太快而變得鍾意同人包拗頸！
第４宮
講完自己講完錢講完學習，終於都輪到屋企啦！大部分入門的占星書都會話第４宮係代表家庭，呢個講法當然係冇錯，不過呢，就略嫌太過以偏概全啦！第4宮掌握的確實係「家」，而呢個「家」有兩個含義，一個就係指屋企人，至於另一個呢就係講居所。「屋企人」的意思係同家庭、家人、遺傳有關，主要係說明家庭的背景同特質。舉例，一個第４宮係水瓶座的人，佢的家庭生活模式一定同一般人有好大分別，可能係由阿媽出去搵食阿爸負責做家務：又可能係屋企一家上下打成一片，唔似其他屋企咁樣樣講輩份！如果有木星同金星呢兩粒吉星響第4宮，當事人的出身會相當唔錯，仲有唔好唔記得，當一個人成家立室之後的屋企情況亦會受到第4宮影響。第４宮另一個特點係響解構家人時又會特別以當事人的媽媽為主，咁爸爸呢？就會參考第10宮。
至於另一個含義「居所」，就係講寓所、住宅、家居環境等等一切同衣食住行的「住」有關的東西，例如一個第4宮係山羊座的人，佢的家居布置傾向鍾意實而不華，唔多喜歡招呼其他人到佢家中作客；如果想知道一個人有冇買賣物業的運氣就要睇睇第4宮啦！其實要再深一層去睇第４宮的意義，用「起源」同「歸宿」會比用「家」更加貼切。「起源」說明從何而來；「歸宿」說明從何而去。第４宮稱得上係情感的根源，仲包含有個人情緒、晚年生活，唔可以只局限於代表屋企。
第４宮對應巨蟹座，支配星係月亮；當巨蟹座或者月亮落響第４宮時力量會比正常提高。宮位過強會造成當事人太過小心，過分依賴屋企人，為人敏感同容易受傷，有時仲會表現得太過情緒化。
第５宮
大多數人說明第５宮的定義時，都會話呢個宮係掌管細路仔同戀愛，仲有係投資，不過呢個講法只係狹義，第5宮的廣義係「創作」加「風險」的混合體。所謂「創作」同「風險」，前者係指將唔存在的東西萌生出來，由零到有；後者係指存有一定的危險機率，應該係話唔一定會出事，但會有機會出事。咁兩者結合會係咩意思呢？有咩東西會符合以上的條件呢？只要畀Ｄ想像力知道，就係－戀愛、細路同埋投資啦！相信要明白投資就較為容易，但係戀愛同細路就較為難明白兩者之間的關係。
第５宮係掌管戀愛、細路同投資，由呢個宮位可以知道一個人的戀愛運、子女運同投資運。例如一個巨蟹座響第５宮的人，佢對待戀愛的態度會非常謹慎，鍾意細路仔，連帶投資的方面亦都會非常咁保守。另外第５宮亦掌管住創意同娛樂，如果當事人的第５宮好豐富，呢個人的創意同趣味性絕對一流。
順便提提，第５宮的戀愛運同第７宮的愛情運係好唔同，第５宮的戀愛運較為膚淺，除了男女朋友之外，連暗戀、單戀、多角戀都包括在內，反而第７宮的戀愛運就較為深入，指的係長期伴侶形式關係，例如同居、結婚之類。
第５宮對應獅子座，支配星星係太陽；當太陽同獅子座落入第５宮時，第５宮的力量就會得到提升。當宮位力量過強就會變得武斷，甚至縱情而且揮霍，完全唔受控制，亦都無辦法屈居響其他人低下，變得狂妄自大，容易沉溺幻想之中，欠缺踏實穩重。
第６宮
第６宮的特徵係最簡單的，第６宮掌管當事人每日的職責，簡單Ｄ講咪即係指日常工作囉！另外仲包括有工作態度、工作方法、工作夥伴同部屬關係呢Ｄ相關的項目。例如一個第６宮係雙魚座的人，工作的時候會成日糊里糊塗，好在會有其他同事的幫助。又例如一個第６宮係水瓶座的人，佢的工作往往會異於常人，唔是做日夜顛倒的工作就係做一Ｄ較為冷門的工作。同第５宮第７宮的愛情宮位一樣，第６宮同第10宮都係睇有關工作方面的情況，唔同的係第６宮涉及的範圍較為狹窄，指的係例行工作，可以稱呼做工作運；而第10宮涉及的範圍就較廣泛，當中亦包括有地位形象、目標志向，可以稱為事業運！要明白工作順利並唔代表事業會成功，兩者有好大分別！
每日辛勞工作，難免對健康多多少少有影響，所以第６宮亦有掌管住另一個同工作息息相關的範疇－健康。響占星術之內同身體有關的部分有第１宮、第６宮同太陽身處的星座：第１宮係指天生體質，強壯定孱弱？要知邊部分天生有問題都係睇呢度，例如上昇點響天蠍座的人唔論男女生殖器官都會較易出問題。至於第６宮就可以睇到當事人的身體狀況，邊方面會較容易受到工作壓力的影響而生病，例如第６宮係處女座的人一旦受壓力，腸臟一定會先出問題！最後太陽身處的星座係損耗最高的身體部分，例如一個太陽響山羊座的人，佢的骨骼包括牙齒同骨質都會較為容易出問題。
第６宮對應處女座，支配星係水星；當水星又或者處女座落入第６宮時，第６宮的力量就會大大提升。當第６宮力量過強就會變得挑剔而且神經質，對周邊的環境過分敏感，對其他人同自己都會好高要求！
第７宮
如果話第１宮是係代表「自我」，咁對正佢的第７宮又會代表咩呢？當人擁有錢、知識、屋企、娛樂、工作，之後自然就會希望可以有番個伴，而第７宮就係掌管住夥伴。進一步去解釋，第７宮的意義係同其他人分享，這呢個「其他人」並唔止解作男女戀愛的另一半，凡係長時間維持住關係，當中包括好朋友同生意夥伴，總之就係願意同佢分享，當然對方亦願意同你分享的人。一般講大部分最關心第７宮的意義就係透視當事人的婚姻態度，舉個例子，一個第７宮係雙子座的朋友，雖然今年已經差不多40歲，但仍然未結婚，唔係唔肯只係佢的另一半好似走馬燈咁換過唔停，冇一個可以維持到談婚論嫁的階段。隨住社會態度開放，第７宮再唔係局限於婚姻關係，連帶同居甚至乎係愛情長跑的情侶亦會參考響裡面。
第７宮仲包含有另一個意義，公開的敵人同仇人。無論係公開的敵人定係仇人，都係泛指果Ｄ惡意搶當事人資源的人，而且係當事人會知道，而唔係響背後暗中作梗的敵人。
第７宮對應天秤座，支配星係金星；當天秤座或者金星落響第７宮，呢個宮位的力量會得到提升。當呢個宮位過強，對世界上有關正義的事情就會變得太過批判，性格優柔寡斷，過份睇重其他人對自己的睇法，變得無立場！
第８宮
要解釋12個宮位唔同的代表意義時，最困難同最麻煩的就係要講第８宮同第12宮。一般好入門的入門占星書響介紹第８宮的時候會話佢係掌管死亡的宮位，雖然咁講冇錯，但其實比起其他存在的掌管意義，死亡應該係最表面果個！由第１宮至第６宮係自己面對自己的內部世界；第７宮至第12宮係自己同其他人交流的外向世界。第８宮同佢對面的第２宮都有資源的意思，唔同的係第８宮的資源係由當事人分享其他人的資源，就係咁，第８宮代表可以繼承返來的錢，當中指由屋企人、生意夥伴又或者由配偶果邊來；偏財運凡係六合彩、賭波、買馬、打麻雀等等，如果想知道自己有冇不勞而獲的運氣，就要由第８宮入手研究。當然「剃人眼眉者亦會被人剃之」，呢度亦可以睇到自己要同其他人分享的資源－保險同稅項。
既然話第８宮係物慾世界，講完「物」就到「慾」啦！第８宮掌管住性，要了解一個人對性的態度就要睇佢的火星位置；而要了解一個人的性生活狀況就要睇埋佢的第８宮。舉個例講，一個人的火星響人馬座，佢的腦海裡面對性有千奇百怪的睇法；不過鑑於佢的第８宮係處女座兼無任何行星同相位，結果就係現實中佢的性生活只能夠用一潭死水來形容。
最後，因為第８宮同死亡扯上關係，所以多多少少都會同神秘學、奧儀學呢Ｄ唔能夠解釋的事項扯上關係，大部分擁有靈媒天賦的人，第８宮的狀況都會有Ｄ特別！
第８宮對應天蠍座，支配星係火星同冥王星；當天蠍座又或者火星、冥王星落入呢個宮位，宮位的力量就會得到提升。當第８宮過強時會出現沉迷黑暗層面，過分追求肉體享樂，對其他人構成威脅，沉溺於神秘的未知世界之內。
第９宮
同人分完身家，應該係時候增廣一下見聞，所以由第８宮的臭錢去到第９宮的增廣見聞！第９宮涉及的係人生的精神層面，佢代表住高等教育、哲學同埋宗教，凡係同智力探究有關的範疇；仲有係法律、長途旅行、海外的事物。第９宮同第３宮涉及的都係心靈的需要，兩者的分別係第３宮傾向追求較基本的知識，而第９宮就係嚮往的係似「知識之母」哲學同宗教等更高層次的學問。有呢Ｄ人響早期的求學階段成績一般，但又響升讀大學之後會越戰越勇，甚至乎成為某學術科目的權威，呢個就係因為佢的第３宮及唔上第９宮更有力量！
另外呢，第９宮掌管住海外事物，一個人適唔適合響外國發展？會唔會對異國的事物情有獨鍾呢？全部都取決於第９宮；另外同第９宮扯上關係的仲有正義感。總而言之，第９宮握住大智慧，屬於高層次的思想活動，同第３宮的小聰明唔可以同日而論。
第９宮的對應星座係人馬座，支配星係木星；當人馬座或者木星落響第９宮，宮位的力量會增強。若果第９宮過強，會出現對周邊的事物過分探求，麻木追求目標，鍾意冒險，自我而將思想強加到其他人身上！
第10宮
經過重重的關卡，終於到出生圖的頂部俗稱MC天頂的地方。既然高高在上，第10宮的意義就呼之欲出啦！佢正正就係代表當事人響世界上企的位置，即係社會裡面會得到咩程度的認同。第４宮的認同係面對內部屋企人；而第10宮係要面向成個社會，佢掌管住一個人的名譽、地位、專業、角色、權力同成就。咁點樣由其他人身上拎到認同呢？最簡單的渠道就係由事業之中得到，所以第10宮係透過唔同的工作類型，建立自己的事業，繼而再取得名譽、地位同權力，得到外界的認同同尊重。一般占星書都會解釋第10宮係代表事業，事實當然唔止咁少啦！根據一個人的第10宮，大家可以知道呢個人的野心、抱負同希望大家對佢有咩睇法。例如一個第10宮係處女座的人，佢會採用內歛實幹，加倍認真去努力完成所有工作來取得其他人的認同。
第10宮亦代表其他人對當事人的尊重，呢種尊重並唔局限於因為當事人的財富同出身背景，就算只係一個出身平凡，外表普通的人，只要佢的第10宮充滿力量，佢亦可以成為一個響小小社交圈子裡面受到萬人敬重的角色！
此宮對應的星座係山羊座，佢的支配星係土星；當山羊座又或者土星落入呢個宮位時，力量會得到進一步的提升。如果第10宮的力量過強，會因為野心太大而不擇手段，過分著重社會地位，失去生活意義，麻木追求名與利，唔識得尊重其他人！
第11 宮
第11宮掌管住當事人的社交活動，係個點樣的社交活動呢？係一D自己可以選擇而且同你共同分享趣味的人，所指的對象並唔局限於朋友，當中仲包含呢班人能夠幫到你，類似俗稱貴人的角色！由第11宮可以睇出當事人的社交生活，響群體活動時以一個點樣的形象出現，對待朋友的態度同喜歡結交咩類型的朋友。例如一個第11宮係白羊座的人，佢喜歡同權貴交往，響朋友圈子之中永遠係領導角色，但對朋友又非常有義氣。如果想了解同某人成為朋友後要注意Ｄ咩，就要睇睇佢的第11宮係點！
另外，第11宮仲有兩個含意：一個係目標同願望，尤其係長遠的目標同願望，所謂的目標同願望係指一Ｄ唔直接影響個人生活同精神狀況的人生意義，例如一個第11宮係金牛座的人希望退休後可以有一個小農場兼響果度安享晚年；又例如一個第11宮係巨蟹座的人就係正積極儲錢開一間屬於自己的小茶座，呢Ｄ都係佢心底裡面的小願望。而第二個係響群眾之中的生活體驗，代表住人道理想、博愛主義同社會意識。
第11宮對應水瓶座，支配星係土星同天王星；當水瓶座、土星或者天王星落響第11宮，影響力就會大大提高。呢個宮位過強會令人變得過分追求所謂的理想，行為偏激，完全唔信其他人，對人太過冷漠同藐視其他人！
第12宮
睇過晒11個唔同性質的宮位，終於輪到最後一個啦！要明白第12宮究竟係講乜係件非常麻煩的事。要講出第12宮掌管咩好似好簡單，但要解釋好麻煩！第12宮係同當事人潛意識有關，咁何謂潛意識呢？潛意識（unconscious）係由弗洛伊德為首的精神分析學派的專用術語，根據弗洛伊德提出意識共有三個層次，最上層係意識，就好似冰山見到的部分；而響中間的係前意識，即係冰山載沈載浮的部分；而最底層唔可以見到的部分就係潛意識。潛意識係潛藏響大家內心深處不為當事人所知的意識，當中存有好多欲望、衝動、痛苦記憶同想像，因為受到當事人刻意抑壓而一直潛藏住。
第12宮就係咁樣的秘密花園，佢將當事人較為負面同唔踏實的一面抑壓住，同第６宮的按部就班比較，第12宮就好似脫韁野馬咁，第６宮教大家努力工作，守紀律踏實；而第12宮就教大家放縱，只要鍾意就算係壞事都可以去做，等當事人可以由現實之中逃之夭夭，係煩惱的根源。總言之，大部分的占星書都會話第12宮係麻煩的引爆點，雖然係有D道理，不過只要響明白之後努力去克服佢，基本上佢的存在亦唔一定係係壞事！
第12宮對應雙魚座，支配星係木星同海王星；當雙魚座、木星或者海王星落響第12宮，力量會大大增強。如果呢個宮位過強，就會變得畀潛意識牽引人生，成日出現逃避現實，容易過分沉迷響幻想之中，容易有酗酒或者食藥的傾向。
水星
水星會左右大家的意識，指的係邏輯、思考、通訊同教育常識。佢用的工具係語言，方法係傳遞，當中包括閱讀同書寫；說話同傾聽；觀察同思考。由於水星同太陽的軌道非常咁接近，水星運行得好快，一個月起碼可以經過兩個星座，所以太陽同水星身處的星座不出前後一個，例如太陽響雙魚座，佢的水星就只會響前一個的水瓶座或者後一個的白羊座，又或者係同樣響雙魚座。相比起計太陽同月亮，要計水星響邊就冇咁簡單，所以唔響度詳細講解，如果大家有興趣可以搵電腦軟件幫下手！
響傳統的占星之中，水星負責雙子座同處女座；佢幫處女座提升力量；削弱損害人馬座同雙魚座；減弱雙魚座的力量。水星的符號象徵住使者之神墨丘利有對翅膀的頭盔。水星的屬性係中性，活動能量亦可以變更，影響的身體部位係神經系統、手部、背部、手指同肩膊。
水星就等同左腦，控制大家的邏輯推理同語言能力，點樣思考？點樣追求知識？表達能力又係點樣？溝通能力如何？都好取決於水星響邊度，例如水星係水瓶座的人會傾向脫離常軌的思考形式，正一估佢唔到；山羊座的人就會用踏實保守的方式追求知識，即係鍾意死讀書；而處女座的組織能力好高不過好囉嗦！又例如水星落響第3宮，呢個人的表達能力好好；落響第9宮的人外語天份好高；總之一切同溝通傳訊思考有關的都係由水星掌管著。
水星係需要活動時先至會活動，例如需要溝通的時候用到的語言，整理資料時需要的辨識能力，佢完全係一個理智行動系統，同掌管創意藝術的右腦有好大分別。水星另一個功用係顯示一個人會為咩而動腦筋？例如係為事業？學業定係談戀愛？即係如果水星響第６宮的人佢會為工作而絞盡腦汁。另外水星亦掌管住旅行，一個人鍾意去邊度旅行、鍾意咩形式的旅行、鍾意同d咩人去旅行都會受到水星的影響。響生命的歷程之中，水星掌管的年齡係８歲至14歲，響這段期間會開始接觸外間的事物同埋思考學習。
響出生圖入面水星身處的星座同宮位會顯示出當事人的思考方式、語言表達能力、知識的追求態度、溝通同組織力；另外同旅行有關的資訊亦可以由水星位置中知道。水星身處的星座會講畀大家知當事人心智活動的傾向；身處的宮位會講畀大家知當事人會放精力響人生邊個方面度，要了解一個人的智能高低就要由佢的水星入手。想知道你男朋友或者老婆會唔會點極都唔明同你溝通唔到呢，就要好好拆解佢的水星啦！
水星白羊 講說話直接了當，鍾意做決定，冇乜耐性慢慢傾！
水星金牛 有效率，缺乏幽默感，諗法迂腐！
水星雙子 思路清晰，腦筋轉得好快，咩都識咩都有興趣！
水星巨蟹 一切以感情為先，但唔夠理性，容易情緒起伏！
水星獅子 表演慾強，有d鍾意吹牛！
水星處女 思考非常精密，語言天份高，但好囉嗦！
水星天秤 光明磊落，心地善良，對人充滿好奇！
水星天蠍 有好強的直覺同洞察能力，太主觀！
水星人馬 樂觀坦率，容易信人，不切實際！
水星山羊 組織力強，態度認真，思想保守！
水星水瓶 思想自由，唔受束縛，有少少離經叛道！
水星雙魚 思考有d混亂，冇乜邏輯，第6感好強！
金星
金星表面畀明亮的黃白色雲霧籠罩住，睇落好似散發出好靚的光芒，佢係咁多個行星之中最光最靚的行星，亦因為咁古人自然將靚同戀愛呢d正面的事物同金星扯上關係，令金星等同魅力、審美觀、快樂、金錢、肉慾同享樂。
響占星術入面金星象徵愛同美，佢亦負責支配戀愛、藝術等等等同享樂有關的事項。金星係一個帶有好強性別觀念的行星，佢同火星齊齊被視為一對，分別係金星代表女性而火星就代表男性。同水星一樣，金星的軌跡亦同太陽好接近，所以佢落入的位置亦唔會離開太陽前後超過兩格：假設一個太陽響巨蟹座的人，佢的金星位置不外乎係金牛座、雙子座、巨蟹座、獅子座或者處女座。響傳統的占星術之中，金星支配金牛座同天秤座；為雙魚座增加力量；減低白羊座的力量；亦會減弱處女座。金星的符號係「♀」，代表住愛神維納斯愛不釋手的鏡子，呢個符號而家已經成為女性的象徵。金星的屬性係暖同濕，活動能量係陰性；支配的身體部位係頸、喉嚨、甲狀腺、腎臟、卵巢同靜脈。
一提到金星永遠離唔開愛愛愛！其實她並唔係只局限於講愛情，金星係掌管享樂，意思即凡係果d透過五官帶來的歡愉感覺，當中有由戀愛得到的，有由社交得到的、有由享樂得到的，就好似阿媽阻止個女拍拖，一方面要擔心個女畀人呃，一方面又要擔心個女顧住拍拖影響成績；戀愛就係享樂的一種，而享樂本身就係金星的課題。
先講講戀愛，金星影響當事人的戀愛模式：對男性來講金星影響佢會特別注意邊類型的女性；而對女性來講金星就會影響佢鍾意用邊種方法來展示自己的魅力。例如一對同樣係金星響天秤座的男女，男的會畀又優雅又靚的女性吸引；而女的就鍾意用優雅大方來吸引男性的垂青。另外金星亦掌握大家的社交態度，吸引其他人的地方同審美觀：一個金星響天蠍座的人響社交總係略帶冷漠神神秘秘咁，而且對美感帶住好濃厚的個人主義。
金星象徵享樂主義，所以連帶佢同金錢亦有好密切的關連，要享樂自然要先有錢，所以由佢亦可以睇到一個的賺錢能力同傾向，好似一個金星響雙魚座兼第７宮的朋友，佢只會向佢的另一半拎錢，又鍾意發埋一d同賺錢有關的白日夢，而唔會踏踏實去搵錢。響生命歷程之中，金星響15歲至24歲期間最具影響力，畀大家盡情享樂同去談戀愛。
響出生星圖入面，金星落入的星座同宮位係表現個人的喜好、價值觀、人際關係、響社交生活的吸引力同賺錢能力。金星身處的星座係當事人對愛情的態度；金星落入的宮位係當事人表現吸引其他人的地方。如果想睇穿鍾意的男仔對邊類型的女仔特別有興趣呢，就要好好研究下佢個金星位置！
金星
介紹完女人味十足的行星金星之後，跟住就要為大家送上男人味十足的行星－火星。響古人眼中，火星成日同山林大火、戰爭、熱同災難扯上關係，所以響占星術之中火星係粒小凶星(大凶星係土星)！佢的代表意義有熱情、爭執、攻擊、身體的能力、防禦力、暴力同性。火星響占星裡面象徵個人行動、活動同勇氣，同時亦影響到一個人脾氣好壞同性傾向。
響傳統的占星術，火星支配住白羊座同天蠍座；為山羊座增加力量；損害金牛座同天秤座；另外削弱巨蟹座。自從發現冥王星，因為冥王星同天蠍座的神秘氣質好相似，自此之後天蠍座就過契畀冥王星支配，不過響分析出生圖時，仍然要參考火星對天蠍座的影響，唔可以唔睇。火星的代表符號係「♂」，有d講法係男性性器官的象形，亦有講係羅馬戰神馬爾斯的長矛同盾牌。行星的屬性係熱同乾，活動能量係陽性，支配的身體部分係頭、肌肉、性器官，尤其指男性器官。
火星提供的係最原始的力量，佢就好似火藥咁，用響歪途會造成嚴重的死傷，用響正途上面會造成方便同效率。由正面來講，佢帶來勇氣同積極，就同大家放響建設工作上面；但同時佢亦會帶來破壞同鬥爭，令世界出現毀滅同混亂。呢種力量轉換到人的身體上時會透過行動力、性同暴力中展現出來。
火星會講出當事人點樣釋放呢股能量：例如一個火星響白羊座的人，無論面對大小事項，佢都會鍾意以簡單直接的方式解決，返到屋企先發現頭先買的物品攪錯，就算要用半個鐘頭以上的車程，佢都會諗都唔駛諗即刻換衫出門口趕響閂舖前返去更換。大家的行動力啦，用咩方式去實行啦都係由火星來推動！當事人點樣去面對戰鬥，亦都係由火星掌管，例如火星響處女座的人會以努力實幹去面對挑戰；而山羊座就會用忍耐同踏實的方法去面對。
如果話水星負責大家的理智部分，咁火星就係屬於唔理性的部分，即係一瞬間的爆發力。簡單講一個人的暴力傾向同對性的態度都係火星的課題，好似火星響金牛座的人潛藏住嚴重的暴力傾向，迫得太緊佢就會爆發；又好似火星響人馬座的人性態度開放，唔係話佢濫交，而係話佢較能夠接受唔同的新嘗試又或者性玩意。雖然火星係危險，但係只要可以好好運用，佢會成為大家的皇牌，就好似未發達的方法會用響打獵同性；文明的方法就會用響商場競爭同運動場之內。火星響女性的出生圖中影響佢會畀邊類型的男性吸引；而響男性的出生圖入面就會影響佢鍾意點樣展示個人魅力。響生命歷程之中，火星影響住大家35歲至44歲，響呢段時間要為生活而衝刺。
響出生圖，火星落入的星座同宮位會表現當事人的行動力、佔有慾、競爭力同性傾向。火星身處的星座顯示當事人的脾氣同行動力；而落響的宮位就係顯示當事人會響人生邊方面開機關鎗，即係表現得較衝動同熱情，係第２宮的亂花錢？第４宮的早婚？定係第6宮的勞勞碌碌？火星的野性係較難控制，所以響識另一半或者結婚前，唔想畀另一半郁手郁腳就要好好了解下對方的火星啦！
